Kisa Intel Core i3 i5 i7 yo ye? yon ti entwodiksyon bazik

Lè ou ap achte yon nouvo òdinatè, chwa pwosesè a enpòtan anpil pou defini kapasite ak pèfòmans aparèy la. Nan sa Ki pi popilè yo, ou pral jwenn divès kalite pwosesè nan seri Intel Core, an patikilye Intel Core i3 (nwayo i3) , Intel Core i5(nwayo i5) ak Intel Core i7(nwayo i7).

Tante chwazi sa ki pi pwisan an ka parèt nòmal poutan li pa toujou nesesè paske chak pwosesè fèt pou yon tip itilizasyon byen detèmine.

Tèm sa yo ( nwayo i3,i5,i7 ) esansyèl pou konprann seri pwosesè Intel ofri yo. Yo bay enfòmasyon sou diferan kategori tankou pèfòmans, fonksyonalite avèk pri yo. Men kisa ki pwosesè a egzakteman?

Definisyon pwosesè 

Pwosesè a, ki rele CPU ( ki vle di “Central Processing Unit” an anglè), se sèvo prensipal nan yon òdinatè.

Li jwe wòl pou egzekite enstriksyon yon pwogram, pandan li itilize yon seri de operasyon debaz tankou aritmetik, kontwòl flo, ak antre / sòti.

Si nap defini karakteristik prensipal nan yon pwosesè , wap jwenn :

1. Frekans revèy (GHz): Sa detèmine a ki vitès pwosesè a ka egzekite enstriksyon yo.
2. Kantite nwayo (core) : Chak nwayo kapab trete done yo poukont yo, sa ki pèmèt pèfòmans nan divès aplikasyon amelyore.
3. Gwosè kachè (cache size) : Yon kachè se yon espas depo tanporè pou done ki itilize souvan yo; pa egzanp, sim te gade on imaj deja , lè map remonte sou imaj la , lap monte pi vit paske done yo deja chaje nan kachè a epi pwosesè a ka aksede ak yo rapidman. Tank kachè a pi gwo a, tank tretman done yo pi bon.
4. Achitekti: Sa a se konsepsyon entèn pwosesè a ki ki gen on konsekans dirèk sou efikasite ak pèfomans li .

Istwa Intel Core pwosesè: i3, i5, i7

 Se nan lane 2006 ke yo entrodwi konsèp seri pwosesè Intel Core yo avèk achitekti Core , ki te anonse yon gwo chanjman apre peryòd Pentium lan.

Pentium ke Intel te entrodwi nan ane 1990 yo te te vin popilè pou vitès ak efikasite li, sitou avèk Pentium III ke yo te lanse an 1999.

Nan ane apre yo, Intel te lanse seri i3, i5 ak i7 , 3 seri poul te ka plizoumwen divèsifye bagay yo e seri sa te vinn depase de lwen nivo Pentium yo.

• Nwayo i3: Premye nivo sa ki soti an 2010 te sanse pi apwopriye pou tach bazik yo , pou moun ki pa bezwen itilize gwo pwisans, gwo aplikasyon.
• Nwayo i5: Pwosesè  nivo mwayen , nivo sa bay on bon ekilib ant pèfòmans ou bezwen an ak pri wap peye pou li a .
• Nwayo i7: Pwosesè  wo nivo ki soti on ti tan avan i5 lan , Seri sa te fèt pou moun kap chèche gwo pèfòmans pou bagay ki mande anpil pwisans tankou jwèt videyo, koreksyon videyo, elatriye.

Ak chak jenerasyon, Intel amelyore pwisans, vitès, pwosesè donk depi la ou ka we , konprann chak tip pwosesè sa yo ap edew fe on pi bon chwa , ann kontinye!

Nwayo i3: Pwosesè premye nivo yo

Pwosesè Intel nwayo i3 ki jeneralman gen 2 a 4 nwayo, reprezante nivo debaz la nan tout seri CPU Intel Core yo. Pwosesè sa yo sanse fèt pou travay enfòmatik jeneral, ki pa entansif.

Yo pi apwopriye pou moun ki ap chèche yon solisyon ki pa twò chè pou aplikasyon senp, tankou Navigasyon sou entènèt la, travay ak ti lojisyèl biwo tankou Word ak excel epi gade fim ak videyo.

Malgre ke yo ka okipe ti aktivite miltitach, ouvri plizyè fenèt a la fwa, nwayo i3 yo, jeneralman, yo pa rekòmande pou moun ki renmen jwe sou laptop, travay videyo, oswa moun ki ap itilize aplikasyon ki mande anpil pwisans yo.

Nwayo i5: yon nivo mwayen

Pwosesè Intel Nwayo i5 ki gen ant 4 e 6 nwayo reprezante yon pi bon chwa pou moun kap chèche yon konpwomi ant pèfòmans ak pri.

Kòm i5 lan jeneralman gen plis nwayo ke i3 a, sa pèmèt li jere tach ki egzijan yo , sitou pou moun ki renmen jwe jwèt videyo , nan yon nivo ki kanmenn rezonab.

Nwayo i5 lan :

• Amelyore kapasite miltitach konpare ak Nwayo i3 a.
• Pi bon jesyon aplikasyon ki mande anpil resous yo.
• Gwo seri frekans
• Opsyon ki enpòtan pou on moun ki bezwen yon ti kras plis pwisans san yo pa depanse twòp kòb.

Nwayo i7: pou gwo pwofesyonèl ak gamer yo

Nwayo i7 la ki gen ant 4 a 8 nwayo reprezante yon gwo solisyon pou moun ki egzijan anpil yo. Pwosesè sa yo ki chaje nwayo ak gwo frekans, bay gwo pèfòmans. Pwofesyonèl ki itilize lojisyèl ki mande anpil pwisans yo ap jwenn sa yo ap bezwen an . i7 la se pou moun kap itilize aplikasyon ki lou anpil yo tankou premiere pro, after effect, elatriye

Ki jan yo chwazi bon pwosesè a selon bezwen w?

• Kijan pouw chwazi yon bon pwosesè depann de plizyè faktè:
• Itilizasyon entansyonèl: Core i3s yo apwopriye pou travay debaz pandan y ap Core i5 ak i7 ofri plis pouvwa pou aplikasyon miltitech ak mande.
• Bidjè: Evalye konbyen kob ou ka depanse . Nwayo i7 yo jeneralman pi chè lontan.
• Konsomasyon kouran: Pwosesè ki pi pwisan souvan konsome plis kouran.
• Pèfòmans grafik: Si w ap jwe oswa ou nan koreksyon videyo, chwazi yon pwosesè ki gen pi bon kapasite grafik ap san dout pi bon pou ou.

Konklizyon

Si ou deside chwazi ant pwosesè Intel i3, i5, ak i7, konnen ke desizyon sa ap afekte pèfòmans ak eksperyans ou nan itilizasyon chak jou w.

Seri pwosesè sa yo ofri yon varyete nan avantaj ki ka reponn a bezwen diferan chak moun.

Pandan i3 ka pi bon pri ak bese konsomasyon enèji, i5 ofri yon bon balans ant pèfòmans ak pri, epi i7 la prezante pi bon pèfòmans ak fonksyonalite nan yon pri ki piwo.