Kisa ki 5G a? Yon gid senp pou yon kote 4G a stil rete yon lejand

Nan yon peyi kote 4G a jiska prezan poko ka stab, si mwen vinn pale ou de 5G, ou ta menm sipoze ri m.
Poutan, gen anpil kote nan mond lan yo gentan menm konsidere 3G a kòm on mit , on istwa lwenten, tankou yon relik nan pase.

Siw pa konnen, ou ka panse teknoloji 5G a se yon pwomès fitiristik. Sepandan, revolisyon 5G a pa yon vizyon lwen, li deja ap deplwaye nan anpil kote nan mond lan. Nan ti atik sa, nou pral gade ansanm kisa li ye egzakteman? An nou pale.

Kisa Ki 5G A?

Tèm 5G a fè referans a senkyèm jenerasyon teknoloji rezo mobil yo. Li vini dirèkteman aprè 4G LTE a, e teknoloji 5G sa pwomèt yon vitès transfè done ki lontan pi wo pa rapò a 4G a, yon latans ki redwi konsiderableman e yon gwo kapasite pou sipòte koneksyon anpil aparèy an menm tan. Men nou sòt pale de Vitès, Latans ak Konektivite, sa tèm sa yo vle di?

• Vitès: vitès 5G a fèt pou rive jiska 10 gigabit pa segond. Sa reprezante yon kapasite telechajman jiska 100 fwa pi wo pase 4G a, sa ki ap pèmèt ou telechaje fim, pa egzanp, nan kèk segond. Pou mwen ba nou on ide, yon fim 1 giga ap telechaje nan mwens pase 10 segond.
• Latans: Latans lan ki se tan repons ant on aparèy ak rezo a, pral desann anba 10 milisegond nan 5G a. sa vle di moun ki renmen jwe en ligne yo pral jwenn pi bon sèvis lontan..
• Konektivite: Yon lòt karakteristik kle nan 5G a se kapasite li pou jere an menm tan anpil aparèy ki konekte. Gen kèk aparèy nou poko sèvi avèk yo anpil pa bò isit men sa enpòtan anpil pou aparèy IoT yo (Internet of Things), kote plis pase on milyon aparèy mande koneksyon entènèt ki stab ak fyab.

Men fòk mwen di nou, deplwaman konplè 5G a enplike yon enfrastrikti ki pi devlope , avèk on seri ti selil ki pi enpòtan pou eksplwate frekans ki pi wo yo. Sa ki pral reprezante on gwo defi sitou pou kote ke 3G aK 4G a poko janm ka finn deplwaye.

Teknoloji Ki Dèyè 5G A

Senkyèm jenerasyon teknoloji rezo mobil yo itilize anpil teknoloji kle ki fe 5G a pral revolisyone mond lan. Kèk nan teknoloji kle sa yo se Band Frekans yo, MIMO, Modilasyon, Rezo vityèl, Fèb Latans, elatriye.

• Band Frekans yo: 5G itilize band frekans ki wo anpil , yo souvan rele yo rele ond milimetrik. Band sa yo kapab pote done nan yon vitès ki lontan pi rapid pase teknoloji mobil ki la anvan yo.
• Teknoloji MIMO: MIMO vle di “Multiple Input, Multiple Output” an anglè, an Kreyol se sanse “plizyè antre , plizyè sòti” . Sa vle di itilizasyon plizyè antèn sou transmisyon signal yo pèmèt yo resevwa plis done an menm tan. 5G a itilize anpil nan teknoloji sa, ki pafwa enkòpore menm on santèn antèn sou yon sèl aparèy.
• Modilasyon: modilasyon se yon pwosesis yo itilize nan kominikasyon san fil pou voye done sou onde elektwomagnetik. Se tankou yo modifye yon onde pou yo ka ajoute enfòmasyon sou li.

5G itilize yon modilasyon OFDM (Orthogonal Frequency Division Multiplexing), Sa vle di yo divize sinyal la ti bout pa ti bout, menm jan avèk 4G a men ki on ti kras pi optimize pou pi efikas ak pi rapid nan transmisyon done sou rezo mobil yo.

• Rezo vityèl: 5G ka kreye sa yo rele rezo vityèl , ki se ‘network slicing’, ki pèmèt yon pèsonalizasyon ak yon optimizasyon ki baze sou bezwen on itilizatè oswa on aplikasyon, sa ki amelyore pèfòmans ak efikasite yo.
• Fèb Latans: Youn nan avantaj ki pi enpòtan nan 5G a se latans li ki ba, oswa tan reyaksyon ki trè kout ant voye ak resevwa done yo. Sa enpòtan anpil pou nouvo aplikasyon tankou machin otonòm .

Deplwaman 5G a ofri yon vitès akselere men tou kapasite poul konekte anpil aparèy ansanm . Janm te di nou an , sa pral bay anpil posibilite pou tout teknoloji emèjan yo tankou aparèy IoT yo. Siw poko konn kisa yo ye , klike sou li, lap mennenw nan on lòt atik ki pale de yo.

Konparezon ant 3G, 4G , 5G. Evolisyon teknoloji Mobil la

Pasaj de 3G a 4G, epi 5G a pa sèlman yon kesyon de vitès, se on transfòmasyon total de kapasite rezo yo ki pral ogmante itilizasyon anpil teknoloji tankou reyaliye ogmante , vil entèlijan , endistri 4.0 a, elatriye . Pou nou fè on ti kout konparezon teknoloji mobil sa yo :

• 3G a, ki te parèt nan kòmansman ane 2000 yo, te revolisyone mond telekominikasyon an paskel te pèmèt aksè a done mobil, ouvri pòt pou sèvis tankou navigasyon sou entènèt ak imèl sou telefòn pòtab. Li te ofri tou on vitès telechajman jiska kèk megabit pa segond.
• 4G a, ki te deplwaye 10 zan apre, te miltipliye kapasite 3G a. Li te mennen vitès telechajman jiska san fwa pi rapid. Gras a sa, nou ta pral komanse jwenn koze tankou gade fim ak videyo an liy, jwe sou entènèt epi bon kalite apèl videyo.
• 5G, ki se pi resan nan teknoloji mobil yo, reprezante pi gwo avanse a. Avèk vitès telechajman ki ogmante anpil la , moun pral ka gade videyo 4k oubyen 8k san okenn reta, telechaje fim ak senkronize dokiman nan kèk segond , koneksyon fyab e rapid pou machin otonòm yo , sa ki ap enpòtan pou sekirite moun an jeneral.

Zòn Blanch Ak 3G: Reyalite On Peyi Tankou Ayiti

Nan menm kontèks 5G a, Zòn blanch yo se zòn kote menm kouvèti bazik yo pa egziste. Kote sa yo karakterize pa yo mank enfrastrikti nan telekominikasyon modèn yo, sa ki kreye yon gwo izolman nimerik. 

Konsekans reta sa yo depase nivo enkonfò pèsonèl, li afekte devlopman ekonomik, aksè ak edikasyon e souvan sèvis ijans ki mande kominikasyon ki fyab.

Pwoblèm deplwaman ensifizan nan zòn sa yo pa toujou fasil pou trete e premye rezon an se anje ekonomik pou operatè yo. Enstalasyon enfrastrikti sa yo koute chè e mank pouvwa acha anpil moun nan sosyete a avèk anpil kote nan pwovens yo ki pa ka gen anpil moun fè konpayi yo souvan pa vle angaje yo. 

Donk monte 5G avèk tout pwomès koneksyon rapid sa mete limyè sou ijans ki genyen pou eseye rezoud pwoblèm sa rapid, sa ki ap pèmèt Ayiti pran chimen devlopman an tout bon , e lap redwi izolman nimerik ki egziste , pa sèlman ant vil ki pi rekile yo ak pi gwo vil yo men tou ant Ayiti ak rès mond lan.

Konklizyon

Li enpòtan pou moun ki gen pouvwa desizyon yo ak operatè telekominikasyon yo travay ansanm pou simonte defi ki genyen nan deplwaman teknoloji mobil sa yo. Envestisman nan 4G ak 5G se yon angajman pou yon lavni kote tout moun jwi menm opòtinite teknolojik , ki ap pèmèt yon devlopman ekilibre sou teritwa a, sa ki ap tou bay yon gwo opòtinite pou kreye yon koneksyon ak yon lavni ki pi enklizif.