Kisa pwogramasyon ye e poukisa li enpòtan ? Gid pou Ayisyen

Jounen jodia a, pwogramasyon vinn tounen yon konpetans ki esansyèl konpare ak jan li te ye avan. Lontan, ou te kapab di tèt ou ke aprann pwogramasyon pat nesesè paske gen pwofesyonèl ki te kapab pran responsablite sa yo.

Men jodi a, nan peryòd dijital nou ye la, kapasite pou konprann ak manye langaj enfòmatik yo pa sèlman yon avantaj pou pwofesyonèl, men yon gwo kondisyon pou devlopman pèsonèl ak pwofesyonèl tout moun.

An Ayiti, moun ki konn pwograme yo reprezante on pla men e sanse gen 2 rezon ki lakoz sa . Premye rezon an se paske jiska prezan nou poko pran konsyans de nivo opòtinite li ka ofri, lot rezon an se yon gwo mit ki gen nan tèt anpil moun ke ou oblije yon jeni pou ou aprann pwogramasyon

Si mwen ta diw literalman depiw ka fe adisyon ak soustraksyon ou ka pwograme ou pral panse e manti . Ansanm nou pral gade kisa pwogramasyon an ye e poukisa li enpòtan konsa nan mond jodia . Ann pale!

Kisa ki pwogramasyon an ?

“Tout moun ki nan on peyi sipoze aprann pwogramasyon paske li aprann ou kòman pouw panse “Pawòl sa se pa mwen ki dil , se Steve Jobs, gwo antreprenè ameriken ki te fonde konpayi Apple ki te di pawòl sa yo.

Pwogramasyon se manifestasyon lojik , pwogramasyon egal lojik. Lè ou pwograme, ou konsevwa epi kreye yon sistèm enfòmatik k ap rezoud yon pwoblèm byen detèmine oswa fè yon tach byen spesifik.

Anpil moun souvan konfonn pwograme ak kode . Tèm sa yo se vre yo konekte men yo reprezante 2 aktivite diferan.

pwogramasyon gen ladan l devlopman lojisyèl, kote ou konsevwa, devlope, teste, ak mete an operasyon yon lojisyèl ki pote yon sèvis byen presi. Sa a kanmenm enkli ekri kòd enfòmatik nan yon langaj pwogramasyon.

Langaj pwogramasyon : Langaj pwogramasyon an se mwayen kominikasyon ant moun ak machinn yo . Li pèmèt ou ekri enstriksyon ke odinatè yo ka entèprete ak egzekite. Gen anpil langaj pwogramasyon tankou Python, Java, C++, elatriye. Anplis de pwogramasyon an , gen sa yo rele algoritm.
Algoritm : algoritm lan se yon plan detaye ki endike etap pa etap kòman pou rezoud yon tach oswa yon pwoblèm. Chak etap nan yon algoritm dwe klè ak senp.
Sous kòd : sous kòd la se tout liy kòd ki ekri nan yon langaj pwogramasyon ki defini sa ki dwe fèt nan yon pwogram.
Konpilatè : Konpilatè a se yon zouti ki konveti kòd langaj pwogramasyon an an yon langaj ke òdinatè a kapab konprann ak egzekite, ki rele langaj machin.

Langaj pwogramasyon ki pi popilè yo

Gen anpil langaj pwogramasyon deyò a, men genyen ke moun plis itilize paske non sèlman yo efikas anpil men gen anpil bagay yo ka fè nan plizyè domèn diferan.

JavaScript : Langaj sa popilè anpil pou devlopman sit wèb, ke se kote kliyan an oubyen tou kote sèvè.
Python : Langaj sa prèske pa gen anyen li pa ka fè . Anpil moun apresyel pou senplisite l, yo souvan itilize li pou syans done (data science), devlopman sit wèb, entèlijans atifisyèl , elatriye…
Java : Yon langaj ke mwen toujou gen pwoblèm avèl paske li toujou kale m se Java . Yo Itilize li pou anpil tip aplikasyon e moun renmenl paske li mache byen sou anpil platfòm diferan tankou Windows, MacOs …
C++ : Langaj sa se souvan pou devlopman lojisyèl sistèm ak jwèt.
C# : Gen moun ki pral rele l C-dyèz men ann kitel nan non l ki se C-Sharp. Sa se yon Langaj ke Microsoft devlope, li ankouraje devlopman rapid aplikasyon pou platfòm Windows, e yo kòmanse itilizel anpil pou reyalite ogmante.

Chak langaj sa yo gen sentaks pa yo e langaj wap chwazi a depann de ki tip de pwojè wap atreprann avèk tou nivo konpetans ou oubyen ekip ou.

Poukisa pwogramasyon an enpòtan konsa?

Pwogramasyon se yon pilye nan mond modèn la pou plizyè rezon. Premye bagay la, Li pèmèt pwogramè yo patisipe nan inovasyon teknolojik e kreye anpil aplikasyon ak solisyon ki deja revolisyone prèske tout endistri yo.

Anplis de kontribisyon nan kreyasyon travay nan domèn tankou devlopman lojisyèl ak sekirite enfòmatik, pwogramè yo ede rezoud anpil pwoblèm konplike nan divès sektè, tankou medsin, finans, ak edikasyon, avèk anpil aplikasyon ki fasilite w travay ak rann ou pi efikas.

Pwogramasyon pèmèt moun entegre diferan teknoloji epi kreye sistèm ki fonksyone byen ansanm.

Jodia siw bezwen entegre entèlijans atifisyèl, devlopman sit web, siw vle rantre nan reyalite ogmante ak vityèl, kreye jwèt, kreye aplikasyon , tout se pwogramasyon kap edew .

Li difisil pou jwenn on bagay wap itilize jodia pou on pwogramè pat kontribiye ladann , Pou tout sa yo, pwogramasyon se yon konesans ki kapab pote avantaj nan plizyè aspè nan lavi tout moun .

Konpetans on pwogramè

Gen anpil konpetans ki nesesè pouw vinn on bon pwogramè. Kèk ladan yo se :

Adaptasyon : Pwogramasyon an manke yon gwo kapasite adaptasyon paske chak jou teknoloji a ap evolye , siw pa adaptew , ou riske rete dèyè.
Rezoud Pwoblèm : Kapasite pou rezoud pwoblèm se on lòt gwo pwen kle. Pwogramè yo dèfwa konn jwenn pwoblèm ki konplèks e toujou ap chèche jwenn solisyon ki pi efikas yo
Panse kritik : Travay pwogramè yo fè yo konn mande on on gwo analiz ak yon bèl evalyasyon pou jwenn pi bon apwòch yo.
Travay ekip : pwogramasyon souvan fèt an ekip , donk bon kapasite kominikasyon nesesè pouw entèaji avèk lot moun.
Kreyativite : pwogramè se tou chèche envante sa ki pat la deja e vini avek kèk pwogram original
Pouvwa Endividyèl ak Kontwòl Teknolojik

Metriz nan pwogramasyon pèmèt yon moun konprann pi byen sa kap fèt nan koze teknolojik jodia e sa ki pi enpòtan an , li pèmèt ou vinn yon aktè olye de on senp konsomatè. Aprann kreye, kontwole, ak manipile teknoloji a ap pèmèt ou vinn otonòm , lap ba ou plis enfliyans an jeneral e on kontwòl sou anviwonman nimerik la.

Donk ke se pou devlopman pwofesyonèl oswa pèsonèl, pwogramasyon an prezante kòm yon abilite ki nesesè nan epòk nimerik la.

Mesaj pou Ayisyen

Ou menm Ayisyen, kounye a se yon bon moman pou ou kòmanse aprann pwogramasyon. Ke ou vle vin yon doktè, yon avoka, oswa yon enjenyè, konnen pwogramasyon ka ede w monte nan yon nivo ke ou pat menm panse ki posib. Wi, defi yo anpil, men si ou detèmine epi ou deside travay, li pa difisil pou w avanse.

Pwogramasyon se youn nan pi gwo zouti pou kreye, pou devlope, epi pou konstwi. Li pa sèlman ba ou konesans teknik, men li ba ou kapasite pou w kontwole teknoloji a, pou w kreye bagay ki pa t’ egziste anvan.

Ou pa bezwen yon ekspè pou w kòmanse. Gen anpil resous ki disponib sou entènèt la jounen jodia pou ede ou kòmanse.

Konsidere pwogramasyon tankou yon zouti pou libète kreyatif, yon chimen pou reyalize rèv ou, epi yon kapasite pou w enspire chanjman nan kominote w. Pran desizyon sa jodi a pou kòmanse aprann, epi w ap wè koman yon lòt dimansyon nan lavi ap vin louvri pou ou.