Kisa ki Python an! Gid pou ayisyen

0

kisa-ki-python-nan

Anvan mwen kòmanse, ban mwen retire tout konfizyon ki ka fè w panse ke se de gwo sèpan an map pale.

Nan tout langaj pwogramasyon ki egziste yo, python se sanse sa yo plis itilize jounen jodia nan tout kalite devlopman, ke se te nan devlopman jwèt, pwogramasyon bazik, oubyen nan devlopman gwo lojisyèl konplèks.

Langaj sa ke Guido Van Rossum kreye an 1990 e ki pibliye an 1991 , se yon langaj ke anpil moun renmen pou jan li fasil pou w li l ak ekri l.

Siw se on devlopè konfime , li difisil pou menm on fwa ou pat fon ti manyenl e siw fèk ap debite nan pwogramasyon, python se langaj ideyal la pou nenpòt domèn ou vle rantre. Men poukisa? Ann pale!

Kisa ki python an?

Python se on langaj pwogramasyon sous lib (open source), sa vle di tout moun ka itilizel gratis. Li se yon seri enstriksyon kew ekri pou on òdinatè, seri enstriksyon sa yo rele yon pwogram. Pou òdinatè a ka konprann nou, nou itlize on langaj enfòmatik, se tankou on lang tankou kreyòl men ki itilize mwens mo, e kòm pou on lang , li gen on gramè byen presi yo rele sentaks.

Fasilite pou aprann

Jan mwen te di nou an , python se langaj pwogramasyon yo plis itilize e mwen pral baw 5 rezon ki fè moun renmen l konsa:

  • Sentaks : Premye rezon an se sentaks li. Yon devlopè ki te aprann C++ oubyen Java ka diw, sentaks la se youn nan gwo rezon anpil moun bay vag ak on langaj pwogramasyon. Gwo avantaj python genyen se ke li te fèt pou sentaks li ka klè ak lojik. Dayè, Li menm plis sanble ak lang anglè a ke yon langaj pwogramasyon tipik. Klarite sa a fè Python vinn pi aksesib pou anpil moun ki fèk ap kòmanse nan pwogramasyon,paske li pèmèt yo konsantre sou aprantisaj konsèp pwogramasyon yo olye yo nan dekripte on bann sentaks ki konplike
  • Kominote ak resous: Python gen yon kominote tèt chaje. Pou m eksplike nou pi byen, tank kominote an gran , se plis ou jwenn resous ak materyèl pou w fonksyone . Sa ki fè kantite titorièl, fowòm diskisyon, videyo, ak dokimantasyon ou jwenn sou entènèt la ki pale de python anpil anpil.
  • Polivalans: twazyèm rezon ki fè moun renmen python anpil , se vèsatilite l. Python se yon langaj ki ka itilize nan plizyè domèn diferan tankou devlopman wèb, syans done, otomatizasyon, elatriye. Sa vle di siw aprann grenn langaj sa , ou sanse imedyatman gen aksè ak on ekip domèn nan koze enfòmatik.
  • Anviwònman devlopman : IDE (Integrated Development Environments) ki pi popilè pou python tankou PyCharm oswa VSCode fasil anpil pou itilize .

Konparezon ak enspirasyon: Enspirasyon Python soti nan plizyè lòt langaj, tankou C, Java, ak Perl, pandan li elimine prèske tout aspè ki difisil yo. Sa ki fè siw aprann kode nan python, konsèp ou aprann yo kapab aplike nan anpil lòt langaj.

Polivalans Python

Jan mwen te mansyone talè a, python se on langaj ki polivalan. Kapasite adaptasyon li fè yo aplikel nan anpil domèn diferan. Si ou ta renmen kòmanse ak python, ann gade kèk nan sektè yo plis itilizel yo.

  1. Devlopman Wèb: Python, gras a framework tankou Django ak Flask, ka kreye sit wèb ki solid
  2. Analiz Done: Bibliyotèk tankou Pandas ak NumPy fè Python vin yon zouti pwisan pou trete done ak vizyalizasyon statistik.
  3. Entèlijans Atifisyèl: Avèk zouti tankou TensorFlow ak Keras, Python se langaj premye chwa pou koze aprantisaj machin ak rezo neral yo.
  4. Otomatizasyon: Siw konn kode, gen de tach repetitif ou pap janm fè anko tankou voye imel konfimasyon pou on seri de kliyan apre yo finn achte an liy
  5. Devlopman Jwèt: Pou mwen onèt, devlope jwèt se pa sa python fè pi byen, men ou ka toujou itilize l pou devlope jwèt avèk bibliyotèk tankou Pygame.
  6. Devlopman Aplikasyon Biro: Avèk zouti tankou Tkinter, Python pèmèt tou kreye aplikasyon ak yon bèl entèfas grafik .

Sa yo se jis kèk grenn nan saw ka fè avèk python e chaje lòt ankò. Tout bibliyotèk python genyen yo fè li prèske adapte pou nenpòt ki tip de pwojè ou genyen . Donk siw fèk ap kòmanse , python se langaj premye chwa a.

Konklizyon

Pwogramasyon konn entimidan lè ou fèk ap debite, e si w pa fè on chwa stratejik, Gen on moman ki rive ou ka dekouraje.

Youn nan rezon ki fè mwen tap konseye on moun kòmanse avèk python, se paske non sèlman li se yon langaj ki relativman pi fasil pou w aprann ak konprann, men li pi fasil pou w jwenn on moun edew si w bloke avèk tout moun ki gen nan kominote a

Sa vle di, lè ou chwazi Python, ou pa sèlman chwazi yon langaj pwogramasyon, men ou antre nan yon kominote ki pre pou ede w, sa ki ka fè pwosesis aprantisaj la pi enteresan pou ou.