Konprann Kisa Ki Kòd QR la! Yon Gid Pou Tout Ayisyen
Kisa Ki Kòd QR la?
Kòd QR se on envansyon ki fasil pou itlize e ki rann lavi tout moun lontan pi fasil. Moun ki a letranje yo , si wap suiv byen wap wè itilizasyon l ogmante anpil , sitou apre korona viris la . Nan yon period kote tout moun ap chèche minimize ris kontak fizik , Kòd QR la vinn reprezante on zouti enpòtan nan mond jodia. Restoran itilizel anpil , otèl itilizel anpil menm jan ak konpayi vwayaj yo ak anpil lòt .
An Ayiti, siw retire kèk restoran ak otèl , epi kèk aplikasyon tankou MonCash, ki eseye entegrel nan sistèm yo , anpil moun pa konprann kisa li ye , sa fè yo deside pa itilizel. Mwen pral eksplike nou byen vit nan ti atik sa, san nou pa itilize gwo tèm teknik, kisa Kòd QR la ye.
Devlopman Kòd QR la
Kòd QR la (an anglè “Quick response Code”) se on Kòd ke telefòn oubyen yon aparèy ki ka skane ka li byen rapid. Lè Kòd sa skane , li transfere on pakèt enfomasyon bay aparèy ki skanel la.
Kòd QR la sanble anpil ak sa nou rele Kòd ba a , tou 2 le yo skane transfere anpil enfòmasyon men gwo diferans lan se ke , malgre Kòd ba a itilize tout lajè l poul kenbe enfomasyon yo, ou ka li l sèlman nan on sèl direksyon, soti anwo rive anba.
Sa ki fè ke kantite enfòmasyon li ka kenbe yo limite. Yo souvan itilizel nan makèt oubyen aplikasyon ki pa bezwen stoke anpil enfòmasyon.
Kòd QR la li menm , ou ka li l nan 2 direksyon , soti anwo rive anba epi soti adwat pouw al agoch, sa ki rann kantite enfomasyon li ka stoke yo vinn anpil, e sak fè anpil sit wèb ak aplikasyon itilize yo.
Istwa Kòd QR la
Kòd QR la devlope an 1994 pa yon konpayi japonè ki rele “denso wave”, li te devlope pou swiv machinn nan endistri mobil, aprè ki vinn elaji sou plizyè lot sektè, jiskaske korona a vinn akselere itilizasyon l, lè l ofri on solisyon san kontak fizik pou pataje enfòmasyon ak tranzaksyon.
Avan kreyasyon sa , tout konpayi te konn itilize Kòd ba tradisyonèl la , sa te pèmèt yo swiv tout pati ak materyèl nan sit fabrikasyon yo.
Men a koz chanjman ki vinn genyen nan zafè pwodiksyon an mas yo, jan mwen eksplike nou anlè a , Kòd ba tradisyonèl la te vinn pa ka reponn ak tout kantite done yo, konpayi yo te oblije itilize on mwayen ki pi fleksib pou yo te ka gen plis kontwol sou pwodiksyon ak yon Kòd ki gen plis kapasite pou anrejistre enfomasyon yo .
Mashahiro Hara ki te youn nan anploye nan konpayi an, te vini avèk ide yon kare , paske kare a te fasil pou rekonèt, li te pèmèt ou li Kòd la nan direksyon vètikal ak orizontal, epi li te pèmèt ou li enfomasyon Kòd la 10 fwa pi rapid konpare ak Kòd ba a.
Kòd sa te mache , e konpayi an mete envansyon sa piblik an 1994, san li pat fè suivi legal yo konsènan patant , sa vle di teknoloji a te vinn “open source “, ki vle di gratis ak disponib pou nenpòt moun te ka itilizel .
An 1997 , premye estanda pou ankodaj done Kòd QR yo te etabli e an 2000 yo te ajoutel nan estanda ISO entènasyonal la , sa yo se estanda ke anpil ekspè entènasyonal dakò sou yo, e sa vle di ke nenpòt kote ou ye , koze Kòd QR la tap gen menm siyifikasyon ak pratik.
A mezi ke Kòd QR la vinn pi popilè epi kamera telefòn entèlijan yo vinn amelyore , anpil moun kreye aplikasyon ki ka li Kòd QR la, se la ke an 2017 , android ak apple avèk nouvo update yo entegre Kòd QR la nan sistèm yo , ki pèmèt ou li Kòd la san ou pa itilize okenn aplikasyon.
Kijan Kòd QR la mache
Kòd QR la gen 7 eleman prensipal. Chak eleman sa yo kreye yon kalite de patèn ki sanble anpil avèk jwèt mo kwaze yo e chak eleman sa yo gen on objektif espesifik ki pote enfòmasyon atravè Kòd sa .
- Premye pati nan Kòd la sa Zòn Kalm lan :
Se zòn vid ki antoure Kòd QR la, li la poul ogmante konpreyansyon, pou eskanè a ka byen defini Kòd QR la ak sa ki nan alantou li.
- Dezyèm eleman Kòd la se Makè Deteksyon yo
Yo se 3 kare nwa nan kwen anba agoch, anwo agoch epi anwo a dwat nan Kòd la. 3 kare sa yo pèmèt eskanè a byen rekonèt Kòd la , li l rapid pandan kel endike nan ki direksyon Kòd sa te enprime .
- Twazyèm eleman Kòd la se modèl aliyman an
Sa tou se on ti kare ki plase anba a dwat , li asire ke eskanè ka li Kòd sa menm si ou defòmel oubyen virel tèt anba . Tank Kòd QR la pi gwo , li gen plis modèl aliyman.
- Katriyèm eleman Kòd la se Modèl Distribisyon an.
Sa se on liy an fom L ki pase nan mitan twa kare ki fome makè deteksyon an . li pèmèt eskanè a detèmine kantite kare endividyèl ki nan Kòd la epil edel detèmine ki lajè matris la ye .
- Senkyèm eleman nan Kòd la se Enfòmasyon sou Vèsyon an.
Gen plis pase 50 vèsyon Kòd QR , donk makè sa yo pèmèt Kòd QR la konnen ki vèsyon lap itilize .
- Sizyèm eleman se fòma enfòmasyon an:
Pati sa detèmine tolerans erè ak pousantaj domaj ke Kòd QR la ka tolere san li pa afekte lizibilitel.
- Setyèm eleman an se Kle pou Done ak Koreksyon yo
Se la tout done yo ye , li pataje espas sa ak blok koreksyon done yo , ki pèmèt jiska 30% nan Kòd la ka domaje san lizibilite a pa afekte. Si gen on pati nan Kòd la ki gen domaje , eskanè a ka itilize lot enfomasyon nan lot pati nan Kòd la poul dekode enfomasyon ki domaje yo.
Done sa yo souvan itilize ankodaj binè , chak ti kare sa yo reprezante yon 0 oubyen yon 1. Chak pati kontribiye nan bon fasonman nan kòd la.
Konklizyon
Kòd QR yo reprezante yon gwo avanse nan teknoloji a ak yon solisyon pratik nan mond modèn an. Pandemi a te montre nou ke yo ka itilize nan plizyè domèn, soti nan biznis jiska nan sèvis sante. Kòd QR yo pa sèlman montre nou nan jan teknoloji ka fasilite lavi nou, men tou enpotans ki genyen pou nou adapte nou nan jan bagay yo prale rapid nan mond lan.
